23. júlí 2004

Valsmenn sluppu með skrekkinn gegn HK

HK beið lægri hlut fyrir Val, 0-1, í uppgjöri tveggja efstu liða 1. deildar karla á Kópavogsvellinum í gærkvöld. Leikurinn var bráðfjörugur og HK sterkari aðilinn meirihluta hans, en náði ekki að nýta sér það og Valsmenn sluppu útfyrir bæjarmörkin með þrjú stig sem fleyta þeim í efsta sæti deildarinnar. Fyrsti sigur þeirra í fimm leikjum en HK varð að sætta sig við sinn þriðja ósigur í röð.

Þetta var fyrsta tap HK í 11 leikjum á Kópavogsvellinum en þar beið liðið síðast lægri hlut fyrir tæpu ári síðan, 2-3 gegn Víkingi í hörkuleik í 1. deildinni.

Valur er með 21 stig á toppnum, HK 19 og Blikar með 17 en þeir spila við Völsung á Húsavík í kvöld. Njarðvík og Fjölnir eru næst með 16 stig en rétt er að minna á að í upphafi móts var HK og Fjölni spáð falli úr deildinni.

Árni Thor Guðmundsson var valinn maður leiksins hjá HK gegn Val, af áhorfendum á Kópavogsvelli í gærkvöld. Finnur Ólafsson varð annar í kjörinu, Gunnleifur Gunnleifsson þriðji, Hörður Már Magnússon fjórði og Victor K. Victorsson fimmti.

Lesendur HK-vefjarins geta nú valið á milli þessarra fimm leikmanna.

Það var mikil synd að HK skyldi ekki fá neitt út úr einum af bestu leikjum sínum á tímabilinu. Ef undan eru skildar fyrstu 20 mínútur leiksins var HK betri aðilinn í uppgjöri toppliða deildarinnar og fékk mörg tækifæri til að jafna metin, sem ekki nýttust. Mark Valsmanna á 16. mínútu dugði þeim því til sigurs og þeir endurheimtu efsta sætið í deildinni sem HK hafði haldið undanfarnar þrjár umferðir. En HK-ingar gátu borið höfuðið hátt þrátt fyrir ósigurinn. "Það er engin furða að þessi lið séu á toppnum, þetta eru greinilega tvö bestu lið deildarinnar," fyrrum landsliðsmaður úr Val við þann sem þetta ritar að leik loknum. Fleiri úr röðum Vals voru á sama máli, báru lof á lið HK og töldu sig ljónheppna að sleppa með þrjú stig úr þessari fjörugu viðureign. Það er ljóst að með svona fótbolta og baráttu hefði HK ekki verið í vandræðum með að hirða sex stig úr leikjunum við Stjörnuna og Fjölni, en það er liðin tíð.

Auðvitað er smá hlutdrægni í því - en fjórum sinnum í leiknum gat HK gert tilkall til þess að fá dæmda vítaspyrnu, og í eitt skiptið var dómarinn reyndar búinn að dæma hana, en hætti síðan við. Ótrúlegt að ekki skyldi eitthvert eitt af þessum fjórum tilvikum leiða af sér vítaspyrnudóm, en þeim er lýst nánar hér fyrir neðan.

Valsmenn voru betri aðilinn fyrstu 20 mínúturnar og virtust ætla sér að ráða algjörlega ferðinni í leiknum, og að þeir skyldu ná að skora á þessum kafla dró ekki úr líkunum á að svo færi. En HK-ingar sýndu mikinn styrk, efldust smám saman eftir því sem leið á fyrri hálfleikinn, og sá síðari var nánast einstefna að marki Hlíðarendaliðsins, sem hvað eftir annað varðist með nánast öllu sínu liði í eigin vítateig. Það var nánast með ólíkindum að sjá þessa reyndu leikmenn Vals, sem allir hafa spilað meira og minna í efstu deild, í nauðvörn, hangandi á einu marki út seinni hálfleikinn. Gamalkunnir Valsmenn í stúkunni gripu hvað eftir annað um höfuðið þegar þeirra menn sluppu fyrir horn á síðustu stundu eftir þungar sóknir HK.

Það var aðeins á stuttum kafla seint í leiknum sem Valsmenn náðu einhverjum sóknarþunga, en HK-ingar rifu sig útúr því og undir lokin fengu þeir tvö algjör dauðafæri til að jafna metin - sem því miður nýttust ekki. Brynjar Skúlason og Gunnleifur Gunnleifsson markvörður (af öllum mönnum!) voru þar á ferð í markteignum hjá Val en höfðu ekki heppnina með sér. Varnarmaður bjargaði frá Brynjari á ótrúlegan hátt en Gunnleifur hitti ekki boltann með höfðinu fyrir galopnu markinu!

Þannig gekk leikurinn fyrir sig:

6. mín. Árni Thor skýtur að marki Vals eftir hornspyrnu Harðar Más frá hægri en Hlíðarendapiltar bjarga á marklínu.

8. Jóhann Björnsson skallar til baka á Gunnleif, en of stutt, Árni Pjetursson kemst inní sendinguna og er einn gegn Gunnleifi en skýtur framhjá.

13. Davíð Magnússon fær glæsisendingu frá Finni upp hægri kantinn og leikur inn í vítateig þar sem hann er felldur. Dómarinn er mjög vel staðsettur, virðist í engum vafa og hleypur beint að vítapunktinum - dæmir vítaspyrnu. Valsmenn mótmæla kröftuglega, rjúka í aðstoðardómarann, sem ekkert hafði flaggað. Hann fær síðan dómarann til að skipta um skoðun og dæma aukaspyrnu á vítateigslínunni! Hörður Már tekur hana og þrumar í varnarvegginn, boltinn hrekkur til Victors sem er í ágætu færi á vítateig en þrumar hátt yfir markið.

16. 0-1. Valsmenn fá hornspyrnu frá hægri, boltinn berst út á miðja vítateigslínu þar sem Árni Pjetursson tekur hann á lofti og skorar með viðstöðulausu skoti, í gegnum alla þvöguna og neðst í markhornið hægra megin. Fallegt skot.

17. Birgir Rafn Birgisson skýtur af 20 metra færi en Kristinn Geir markvörður Vals ver örugglega í markhorninu niðri.

20. Þórhallur Hinriksson skallar hátt yfir mark HK úr opnu færi á markteig, eftir langt innkast frá hægri.

30. Hörður Már er á siglingu í gegnum vörn Vals þegar hann er klipptur niður. Varnarmaðurinn sleppur með skrekkinn og gult spjald.

31. Júlíus Valgeirsson tekur aukaspyrnu frá vinstri og Atli Guðnason skallar úr miðjum vítateig, boltinn strýkst við utanverða stöngina hægra megin.

33. Atli fær sendingu í gegnum miðja vörn Vals frá Finni og kemst einn gegn Kristni markverði sem nær að verja skot hans, en fellir í framhaldinu Atla sem þar með á ekki möguleika á að hirða frákastið í markteignum. Ekkert dæmt!

42. Atli sendir fyrir mark Vals frá hægri, beint í höndina á varnarmanni sem stöðvar þannig fyrirgjöfina. Ekkert dæmt!

43. Atli skallar framhjá marki Vals eftir fyrirgjöf Birgis Rafns frá vinstri.

44. Þrír Valsmenn eru kolrangstæðir, langt fyrir innan vörn HK, og einn þeirra skallar framhjá. Skær kvöldsólin hlýtur að hafa blindað aðstoðardómarann!

45. Atli skallar framhjá marki Vals eftir hornspyrnu Harðar Más.

Hálfleikur, 0-1.

55. Árni Thor skýtur að marki Vals úr aukaspyrnu af 30 metra færi, rétt framhjá.

56. Kristinn Geir markvörður Vals fer í glórulaust úthlaup eftir fyrirgjöf frá hægri og keyrir Birgi Rafn niður við vítateigslínuna. Ekkert dæmt!

59. Birgir Rafn tekur aukaspyrnu 20 metra frá mark Vals og skýtur í varnarvegginn, Hörður Már fær boltann og þrumar að marki, en varnarmaður kemst fyrir boltann.

63. Löng og þung sókn HK, þar sem boltinn dansar fram og til baka í vítateig Vals endar með því að Atli nær skoti úr ágætu færi í miðjum vítateignum en Kristinn Geir ver örugglega.

67. Árni Pjetursson í góðu færi við mark HK en skýtur framhjá.

69. Gunnleifur ver skalla Baldvins Hallgrímssonar eftir hornspyrnu, án teljandi vandræða. Eina marktilraun Vals allan síðari hálfleikinn sem hittir á markrammann.

76. Brynjar Skúlason kemur inná fyrir Birgi Rafn.

77. Victor fær boltann frá Atla og þrumar á mark Vals af 20 metra færi, boltinn stefnir í markhornið fjær en Kristinn Geir ver mjög vel í horn.

78. Victor skallar að marki Vals af markteig eftir hornspyrnu Harðar Más frá hægri - boltinn fer beint í hönd Valsmanns í markteignum. Ekkert dæmt!

80. Bjarki Már Sigvaldason kemur inná fyrir Stefán Eggertsson.

81. Ásgrímur Albertsson kemur inná fyrir Júlíus. Fyrsti meistaraflokksleikur Ása síðan hann meiddist í janúar.

84. Árni Pjetursson í ágætu færi eftir aukaspyrnu Vals en skýtur hátt yfir.

86. Jóhann G. Möller, Valsmaður, fær sitt annað gula spjald og er þar með rekinn af velli.

87. HK fær aukaspyrnu rétt við vítateigslínu eftir brotið. Hörður Már tekur spyrnuna og þrumar á markið. Kristinn Geir ver naumlega, boltinn fer fyrir fætur Brynjars Skúlasonar, sem skýtur föstu skoti af tveggja metra færi en á ótrúlegan hátt tekst varnarmanni Vals að kasta sér fyrir boltann, sem fer í hann og í horn!

88. Gunnleifur markvörður er í algjöru dauðafæri í markteig Vals, eftir hornspyrnu Harðar Más frá hægri - fær gjörsamlega frían skalla og þarf aðeins að snerta boltann til að skora, en hittir ekki tuðruna!!

88. Árni Thor fær gula spjaldið fyrir brot.

89. Jóhann fær gula spjaldið fyrir að henda boltanum til Valsmanns sem átti að fara að taka aukaspyrnu.

Aðsókn á leikinn var merkilega góð, stúkan nokkuð þétt og fjölmargir í brekkunni, en samt voru nálægt 200 HK-ingar á öllum aldri fjarverandi vegna keppnisferða. Það ætti því að verða rífandi aðsókn þegar félögin mætast á ný í 8-liða úrslitum bikarkeppninnar á sama stað þann 4. ágúst. Vonandi verða þá stuðningsmenn HK búnir að finna trommurnar góðu, sem voru einhvers staðar læstar inni, þannig að stuðningsmenn Vals sáu einir um trommuslátt í stúkunni að þessu sinni!

Þess má geta að á meðal áhorfenda voru forráðamenn frá Glasgow Rangers í Skotlandi og Örgryte í Svíþjóð en þessi félög eru með lið á Rey-Cup í Laugardalnum þessa dagana.

Lið HK: Gunnleifur Gunnleifsson - Davíð Magnússon, Árni Thor Guðmundsson, Jóhann Björnsson, Júlíus Valgeirsson (Ásgrímur Albertsson 81.) - Stefán Eggertsson (Bjarki Már Sigvaldason 80.), Victor K. Victorsson, Hörður Már Magnússon, Finnur Ólafsson, Birgir Rafn Birgisson (Brynjar Skúlason 76.) - Atli Guðnason.
Varamenn sem ekki komu inná: Beitir Ólafsson, Brynjar Víðisson.

* Atli lék sinn fyrsta leik fyrir HK en hann kom frá FH sem lánsmaður út tímabilið.

Leikmenn/markaskor 2004.
Tölfræði, leikir/mörk.
Leikir mfl.ka. 2004.
Staðan í 1. deild karla.
Leikskýrslan.
Gunnar um leikinn.
Gunnleifur um leikinn.

Ath. Myndir geta ekki fylgt fréttunum fyrst í stað en þær verða myndskreyttar um leið og úr því rætist.

Til baka

Miðvikudaginn 22.maí

19.15 Stjarnan - HK/Víkingur, Pepsi kv., knatt.

Miðvikudaginn 22.maí

20.00 Ýmir - Mídas, 4.deild ka, knatt.

Fimmtudaginn 23.maí

19.15 Hamar - HK, 2. deild ka., knatt.

Mánudaginn 27.maí

20.00 Elliði - Ýmir, 4.deild ka., knatt.

Þriðjudaginn 28.maí

19.15 HK/Víkingur - FH, Pepsi kv., knatt.

Miðvikudaginn 29.maí

19.15 Sindri - Ýmir, Bikar ka., knatt.




Skoða alla skráða atburði

Hvernig gengur HK í 2. deild karla í sumar?

Vinnur deildina

Endar í 2. sæti

3.-5. sæti

Endar neðar