Lög  Handknattleiksfélags Kópavogs

 

Samþykkt af aðalfundi HK  - 24. maí 2006

(21. grein var felld úr lögum og 19. grein var breytt á aðalfundi félagsins 22/3/07)

(Breyting var gerð á 12. og 13. grein félagsins á aðalfundi 19/3/09)

(Breyting var gerð á 12., 13. og 18 grein félagsins á aðalfundi 24/3/10)

(Breyting var gerð á 19. grein félagsins á aðalfundi 26/3/12)

 

1. grein - Nafn félags og varnarþing
Nafn félagsins er Handknattleiksfélag Kópavogs, skammstafað HK. Heimili og varnarþing þess er í Kópavogi.

2. grein – Tilgangur félags
Tilgangur félagsins er að standa fyrir iðkun íþrótta meðal félagsmanna, auka áhuga þeirra á líkamlegu heilbrigði og efla íþróttastarf á starfssvæði sínu. 
Tilgangi sínum hyggst félagið ná með því að efna til íþróttaæfinga, kappleikja, fundahalda og annars er árangur getur borið til eflingar heilbrigðu líferni

3. grein – Merki félags og búningur

Merki félagsins er stafirnir HK, hvítir á rauðum hringlaga grunni. Búningur félagsins er hvít og rauð treyja, hvítar eða rauðar buxur og hvítir eða rauðir sokkar. Heimilt er að nota svart með hvítu og rauðu.

 

4. grein – Aðild a heildarsamtökum

Félagið er aðili að Íþróttasambandi Íslands (ÍSÍ) og sérsamböndum þess, Ungmennafélagi Íslands og Ungmennasambandi Kjalarnesþings og er háð lögum þeirra og ákvörðunum

5. grein - Félagar
Félagi getur hver sá orðið er æskir þess og greiðir félagsgjöld. Við inngöngu í félagið skal skrá sig í eina eða fleiri deildir sem starfræktar eru í félaginu eða almenningsíþróttahóp aðalstjórnar. Úrsögn úr félaginu skal vera skrifleg og sendast formanni viðkomandi deildar eða formanni aðalstjórnar vegna almenningsíþróttahóps og er því aðeins lögleg að félaginn sé skuldlaus við sína deild og hafi uppfyllt skyldur sínar við hana.
Félagsgjöld greiðast annaðhvort:

a)    eins og ákveðið er af viðkomandi deild eða deildum sem félagsmaður er félagi í eða

b)    samkvæmt ákvörðun aðalfundar HK ef viðkomandi félagi er ekki gjaldskyldur í neinni deild.

Félagsgjöld skv. b lið renna til aðalstjórnar.

 

6. grein - Reikningsár
Reikningsár félagsins skal vera almanaksárið.

7. grein - Aðalfundur

Aðalfundur félagsins hefur æðsta vald í öllum málum þess og hefur einn vald til að breyta lögum þess.

Aðalfundur HK skal haldinn fyrir lok aprílmánaðar ár hvert fyrir starfsárið næst á undan.

Aðalfund skal boða með minnst tveggja vikna fyrirvara. Tilkynning um hann skal þá birtast á heimasíðu félagsins. Jafnframt skal senda tilkynningu til starfandi deilda félagsins og til þess mælst að þær komi upplýsingum um fundinn áfram til félagsmanna.

Aðalfundur er lögmætur ef löglega er til hans boðað.

Endurskoðaðir reikningar fyrir síðastliðið almanaksár skulu hafa borist kjörnum endurskoðendum eigi síðar en 6 dögum fyrir aðalfund.
Rétt til setu á aðalfundi með tillögurétt og málfrelsi hafa allir félagar í félaginu ef þeir eru orðnir 18 ára eða eldri, auk þess eiga boðsgestir aðalstjórnar rétt til setu á aðalfundi HK.

Kjörgengi til stjórnarstarfa og annarra trúnaðarstarfa fyrir félagið hafa allir félagar 18 ára og eldri, sem uppfyllt hafa skyldur sínar við félagið.

Atkvæðisrétt á aðalfundi hafa eftirtaldir félagar:

a)    Aðalstjórn HK

b)    Stjórnir deilda HK

c)    Kjörnir fulltrúar deilda sem haldið hafa löglegan aðalfund og skilað endurskoðuðum ársreikningum. Deildir eiga rétt á að senda á aðalfund félags einn fulltrúa fyrir hverja 20 iðkendur, þó ekki færri en 5 né fleiri en 10 fulltrúa frá hverri deild.

 

Dagskrá aðalfundar skal vera sem hér segir:

1)    Kosinn fundarstjóri og fundarritari

2)    Kosning þriggja manna kjörbréfanefndar

3)    Fundargerð síðasta aðalfundar lesin og borin upp til samþykktar

4)    Lögð fram skrifleg skýrsla aðalstjórnar og skýrslur deilda

5)    Lagðir fram endurskoðaðir reikningar aðalstjórnar ásamt endurskoðuðum reikningum einstakara deilda miðaðir við almanaksárið

6)    Umræður um skýrslu og reikninga aðalstjórnar. Reikningar aðalstjórnar bornir upp til samþykktar

7)    Lagabreytingar

8)    Dagskrármál önnur

9)    Kosningar

a)    Kosning formanns (annað hvort ár)

b)    Stjórnarkosning

c)    Kosning endurskoðenda

d)    Kosning uppstillingarnefndar

10) Ákvörðun félagsgjalda félagsmanna

11) Önnur mál

 

Á aðalfundi ræður einfaldur meirihluti atkvæða úrslitum mála.

Til þess að breyta lögum félagsins þarf þó tvo þriðju hluta greiddra atkvæða.

Að jafnaði skal ekki taka til formlegrar afgreiðslu önnur mál en þau sem birt eru á formlegri dagsrá aðalfundar. Leita má þó afbrigða og taka mál til formlegrar afgreiðslu undir liðnum önnur mál, en tvo þriðju hluta greiddra atkvæða þarf til að afbrigði nái fram a ganga. Tvo þriðju hluta greiddra atkvæða þarf til að tillaga, sem borin er fram undir liðnum önnur mál, hljóti samþykki.

Enginn getur farið með nema eitt atkvæði á aðalfundi.

8. grein – Aukaaðalfundur

Aukaaðalfund skal halda ef aðalstjórn telur þess þörf, eða ósk þar um berst frá meirihluta deilda félagsins. Aukaaðalfundur er lögmætur, ef til hans er boðað samkvæmt ákvæðum 7. greinar þessara laga. Aukaaðalfundur hefur sama vald og aðalfundur, nema lagabreytingar og stjórnarkosning getur ekki farið fram á aukaaðalfundi.

 

9. grein - Aðalstjórn

Aðalstjórn HK fer með æðsta vald í málefnum félagsins og deilda þess milli aðalfunda.

Aðalstjórn HK skal skipuð formanni og fjórum stjórnarmönnum, sem kjörnir eru á aðalfundi félagsins til tveggja ára í senn. Einnig er tveggja manna varastjórn kjörin á aðalfundi félagsins.

Félagsstjórn skal kjörin þannig að formaður er kosinn til tveggja ára í senn og á hverjum aðalfundi eru tveir aðalmenn og einn maður í varastjórn í kjöri.

Stjórn skiptir með sér verkum á fyrsta stjórnarfundi eftir aðalfund. Skipað skal í eftirtalin embætti:

Varaformaður

Gjaldkeri

Ritari

Umboðsmaður yngri félaga og aðstandenda

 

Stjórnarmenn í aðalstjórn HK skulu ekki gegna trúnaðarstörfum fyrir neina einingu innan HK.

Aðalstjórn félagsins er forsvari þess gagnvart ÍSÍ, UMFÍ, viðkomandi ungmennafélagi, bæjarstjórn Kópavogs, öðrum opinberum yfirvöldum og aðalstjórn annarra íþróttafélaga. Skal aðalstjórninni heimilt að kalla félagsmenn sér til aðstoðar og skipa starfsnefndir til sérstakra verkefna ef þurfa þykir s.s. til uppbyggingar félagssvæðis og íþróttahúsa.
Verkefni aðalstjórnar eru auk ofangreinds m.a. ýmis stærri fjáröflunarverkefni, skipting styrkja bæjarins, lottógreiðslna og getrauna auk yfirumsjónar félagatals HK.
Aðalstjórn ber ábyrgð á fjárreiðum deilda, hún setur deildum reglur um fjárreiður og meðferð fjármuna og hefur eftirlit með þeim.

Lántökur deilda eru óheimilar nema með samþykki aðalstjórnar.

Leggja skal fjárhagsskuldbindingar s.s. leikmannasamninga og þjálfarasamninga deilda fyrir aðalstjórn til samþykktar.
Aðalstjórn annast rekstur eigna HK, starfrækir íþróttaskóla HK og almenningsíþróttahópa HK.
Kaup, sala og veðsetning fasteigna félagsins er bundin samþykkt aðalstjórnar.

Enga fullnaðaráætlun getur aðalstjórn gert nema með samþykki meirihluta stjórnarmanna.
Skylt er að halda aðalstjórnarfundi minnst mánaðarlega og skal halda um þá sérstök gerðarbók.
Aðalstjórn félagins skal halda sameiginlegan upplýsingafund með stjórnum deilda félagsins í það minnsta tvisvar á ári. Formenn deilda félagsins skulu eiga rétt á setu á einum fundi aðalstjórnar í hverjum mánuði. Rædd skulu þá sameiginleg mál deildanna og aðalstjórnar félagsins.

Aðalstjórn félagsins skal skylt að boða almennan félagsfund ef 30 félagsmenn eða fleiri krefjast þess. Fundarboð sé þá með sama hætti og til aðalfunda.

 

10. grein - Deildir

Félaginu er skipt í deildir sem hver sinnir afmörkuðu sviði íþrótta-, tómstunda- og/eða félagsmála.

Aðalfundur HK setur deildum reglugerðir að starfa eftir.

Hver deild er fjárhagslega sjálfstæð en skal skila endurskoðuðum reikningum og skýrslu til aðalstjórnar 5 virkum dögum fyrir aðalfund deildarinnar.

Hver deild skal færa bókhald samkvæmt reglugerðum ÍSÍ um bókhald deilda.

Hver deild skal halda gerðabók um allar ákvarðanir stjórnar og annað markvert sem varðar starf hennar. Gerðabók skal vera aðgengileg aðalstjórn félags á hverjum tíma.

Hver deild skal halda nákvæma skrá yfir félaga deildarinnar. Félagaskrá deildar skal aðgengileg aðalstjórn félags og framkvæmdastjóra á hverjum tíma. Deildum ber a skila staðfestu afriti af skrá sinni til aðalstjórnar 6 dögum fyrir aðalfund deildarinnar.

Deildir félagsins setji sér eigin lög á aðalfundum deildanna og öðlast þau gildi þegar í stað enda brjóti þau ekki í bága við reglugerð setta deildinni,  lög félagsins eða almenn landslög.

 

11. grein – Stofnun og niðurlagning deilda
Aðalstjórn félagsins skal sjá um stofnun nýrra deilda og skal setja deildum bráðabrigðareglugerð að starfa eftir. Aðalfundur HK sá næsti eftir stofnun deildar, skal setja deild endanlega reglugerð. Stofnfundur deildar skal fara fram samkvæmt reglum um aðalfundi deilda.

Hætti deild störfum er stjórn deildarinnar skylt að afhenda eignir hennar til aðalstjórnar félagsins. Taki deildin ei til starfa að nýju innan 5 ára renna eignir hennar í sjóð aðalstjórnar félagsins. Verði félagið lagt niður skulu eignir þess ganga til Kópavogskaupstaðar til varðveislu og afhendist síðar félagi ef stofnað yrði með hliðstæðum markmiðum.

12. grein – Aðalfundir deilda
Aðalfundir deilda fara með æðsta vald í málefnum þeirra, næst á eftir aðalfund félags og aðalstjórn.

Hver deild skal halda aðalfund fyrir lok marsmánaðar ár hvert.

Boðað skal til aðalfundar með tveggja vikna fyrirvara í miðlum félagsins. Aðalfundur er lögmætur ef löglega er til hans boðað.

Dagskrá aðalfundar deildanna skal vera:

1.    Kosinn fundarstjóri og aðrir embættismenn fundarins

2.    Lesin upp fundargerð síðasta aðalfundar deildarinnar

3.    Lögð fram skýrsla stjórnar fyrir liðið starfsár

4.    Lagðir fram endurskoðaðir reikningar til umræðu og afgreiðslu til aðalstjórnar félags

5.    Kosningar:

a)    Kjör formanns (annað hvort ár)

b)    Kjör varaformanns (annað hvort ár)

c)    Kjör ritara (annað hvort ár)

d)    Kjör gjaldkera (annað hvort ár)

e)    Kjör meðstjórnanda til eins árs.

f)     Staðfesting formanna flokksráða

g)    Kjör fulltrúa á aðalfund HK

6.    Önnur mál

Á aðalfundi skal einfaldur meirihluti greiddra atkvæða ráða niðurstöðu.

Vanræki deild að halda aðalfund á tilsettum tíma skal aðalstjórn félagsins boða til fundarins og sjá um framkvæmd hans.

 

13. grein - Deildarstjórnir

Deildarstjórnir fara með daglegan rekstur deilda milli aðalfunda þeirra og hefur endanlegt ákvörðunarvald í öllum málefnum deildarinnar.

Stjórn hverrar deildar skipa formaður, varaformaður, ritari og gjaldkeri, kjörnir á aðalfundi deildar, formenn flokksráða deildarinnar og formaður barna- og unglingaráðs deildarinnar.

Enginn einstaklingur getur gegnt meira en einu af ofangreindum embættum á sama tíma.

Stjórnir deildanna ráða íþróttakennara/þjálfara og ákveða laun þeirra. Við ráðningu þjálfara til yngri flokka skulu deildir hafa til hliðsjónar stefnuyfirlýsingu Íþrótta- og ólympíusambands Íslands í þjálfaramenntun.

Stjórnir deilda og unglingaráð skulu leggja fram fjárhagsáætlun næsta almanaksárs fyrir lok nóvember til aðalstjórnar. Skili deildir ekki fjárhagsáætlun hefur aðalstjórn heimild til að stöðva alla styrki til deildanna.

Stjórnum deilda er skylt að framfylgja ákvörðun aðalfundar HK um félagsgjöld og æfingagjöld.

 

14. grein - Flokkaráð

Stjórn deildar skal hlutast til um að skipuð séu flokksráð þeirra flokka sem ekki heyra undir barna- og unglingaráð og sinna flokksráðin daglegum rekstri flokkanna. Aðalfundur deildar setur ráðum starfsreglur. Flokksráð skulu hafa sjálfstæðan fjárhag.

Aðalfundur deildar kýs formenn flokksráða ráða, að fengnum tilnefningum.

 

15. grein – Barna- og unglingaráð

Barna- og unglingaráð skal skipað fulltrúum foreldraráða allra yngri flokka.

Barna- og unglingaráð skulu hafa sjálfstæðan fjárhag.

Stjórn deildar skipar formann barna- og unglingaráðs að fengnum tilnefningum ráðsins, en einhliða ef tilnefningar berast ekki. Formaður skipar aðra embættismenn barna- og unglingaráðs að fengnum tilnefningum ráðsins, en einhliða ef tilnefningar berast ekki.

Í starfi yngri flokka skulu unglingaráð hafa til hliðsjónar stefnuyfirlýsingu Íþrótta- og ólympíusambands Íslands um tilhögun íþróttauppeldi æskufólks innan íþróttahreyfingarinnar og stefnuyfirlýsingu ÍSÍ um forvarnir og fíkniefni.

16. grein – Aðalfundir barna- og unglingaráða

Aðalfundur barna- og unglingaráða skal haldinn eigi síðar en 14. mars ár hvert, fyrir starfsárið næst á undan.

Boðað skal til aðalfundar með tveggja vikna fyrirvara í miðlum félagsins. Aðalfundur er lögmætur ef löglega er til hans boðað.

Dagskrá aðalfundar unglingaráða skal vera:

1.    Kosinn fundarstjóri og aðrir embættismenn fundarins

2.    Lesin upp fundargerð síðasta aðalfundar deildarinnar

3.    Lögð fram skýrsla stjórnar fyrir liðið starfsár

4.    Lagðir fram endurskoðaðir reikningar til umræðu og afgreiðslu til deildarstjórnar

5.    Skipan stjórnar:

a)    Tilnefning formanns

b)    Tilnefning tveggja stjórnarmanna

6.    Önnur mál

Á aðalfundi skal einfaldur meirihluti greiddra atkvæða ráða niðurstöðu.

Vanræki unglingaráð að halda aðalfund á tilsettum tíma skal deildarstjórn boða til fundarins og sjá um framkvæmd hans.

 

17. grein - Uppstillinganefnd
Þriggja manna uppstillingarnefnd skal kosin á aðalfundi HK og starfar hún milli aðalfunda.

Uppstillingarnefnd skal auglýsa eftir framboðum og tillögum um frambjóðendur til embætta sem kosið er til á aðalfundi minnst tveimur mánuðum fyrir aðalfund. Fyrir þann tíma ber embættismönnum, sem ekki gefa kost á sér til endurkjörs, að tilkynna uppstillingarnefnd um ákvörðun sína.

Uppstillingarnefnd sannreynir kjörgengi framboða. Uppstillingarnefnd skal í störfum sínum leitast við að fá fulltrúa ólíkra hópa til trúnaðarstarfa fyrir félagið.

Uppstillingarnefnd skal leggja fram tillögu um fulltrúa til kjörs og staðfestingar í embætti á aðalfundi, minnst mánuði fyrir aðalfundinn og skulu þær auglýstar í fundarboði.

 

18. grein - Aganefnd
Aganefnd skal vera starfandi á hverjum tíma í félaginu. Hún skal taka til meðferðar mál félaga og/eða iðkenda sem taldir eru hafa sýnt vítaverða framkomu. Skal nefndin sannreyna mál og ákveða refsingu.

Nefndina skipa tveir fulltrúar settir af aðalstjórn og einn fulltrúi hverrar deildar sem starfandi er innan félags á hverjum tíma. Þegar mál eru tekin fyrir skal bætt í nefndinni dómara í þeirri íþróttagrein sem málið varðar, eða öðrum sérfræðingum eftir þörfum.

Aganefnd má ekki beita úrræðum sem leiða til kostnaðar fyrir félagið, án fyrirfram samþykkis þeirrar deildar sem í hlut á, eða eftir atvikum aðalstjórnar.

Aganefnd telst hæf til umfjöllunar um mál ef mættir eru báðir fulltrúar aðalstjórnar og fulltrúi þeirra deildar sem málið varðar.

Niðurstöðu aganefndar má áfrýja til aðalstjórnar og skal þá umboðsmaður iðkenda fara með mál áfrýjanda.

Aganefnd tekur upp mál sem vísað er til nefndarinnar frá einstaka deildarstjórnum.  Auk þess getur aganefnd tekið upp mál að eigin frumkvæði.

 

19. grein – Sérákvæði um æfingagjöld
Afslættir af æfingagjöldum skulu einvörðungu veittir af þeirri upphæð sem félagið innheimtir hjá iðkenda. Þó skal aldrei veita hærri afslátt en sem nemur 20% af innheimtu æfingagjaldi.

Fjölgreinaafsláttur, deildir félagsins skulu veita 20% afslátt af æfingagjöldum sínum fyrir hvern þann félaga sem kýs að iðka fleiri en eina íþrótt innan félagsins.

Systkinaafsláttur: Deildir félagsins skulu veita 20% afslátt af æfingagjöldum sínum fyrir hvern þann félaga, 17 ára eða yngri, sem á systkin sem greiðir æfingagjald hjá félaginu.

Heildarafsláttur getur aldrei numið meiru en 20% af innheimtu æfingagjaldi.

 

20. grein – Gildistaka

Lög þessi öðlast þegar gildi og falla þar með úr gildi öll fyrri lög félagsins.

Til baka

Mánudaginn 27.maí

frestað 20.00 Elliði - Ýmir, 4.deild ka., knatt.

Þriðjudaginn 28.maí

19.15 HK/Víkingur - FH, Pepsi kv., knatt.

Miðvikudaginn 29.maí

19.15 Sindri - Ýmir, Bikar ka., knatt.

Fimmtudaginn 30.maí

19.15 HK - Breiðablik, bikar.ka., knatt.

Sunnudaginn 2.júní

17.00 HK - Reynir S., 2. deild ka., knatt.

Miðvikudaginn 5.júní

19.15 HK/Víkingur - Valur, Pepsi kv., knatt.




Skoða alla skráða atburði

Hvenær var HK stofnað?

1965

1970

1975

1980

1990